Rík

Lífið er búið að vera gott undanfarið. 

Allavegana fyrri hluti vikunnar. Stefán átti afmæli, orðinn 16 ára, svo við fórum öll saman í keilu á sunnudeginum og á Shake and pizza. Át heila pizzu ein sem mér finnst í frásögur færandi af því að ég borða ekki pizzu nema hún sé með súrdeigsbotni vanalega. Meltingarkerfið mitt fór í smá sjokk en var furðulega fljótt að jafna sig.

Sjálft afmælið var á mánudeginum svo við fórum aftur út að borða,  núna öll heila hersinginn, á Grillhúsið Sprengisandi sem var það sem afmælisbarnið vildi. Við erum átta sem er dáldið yfirþyrmandi en ótrúlega næs líka.

Annars var vikan tiltölulega róleg. Ég lét Óla fá jeppann svo ég var bíllaus. Ætli ég hafi bara ekki haft gott af því að labba í vinnuna, frá Hlíðunum niðrá Suðurlandsbraut í gær og í fyrradag.

Hápunktur vikunnar var móment á mánudagskvöldinu á Grillhúsinu þar sem 393 daga sonarsonur minn leit á mig rannsakandi og mér finnst eins og hann hafi  á þessari stundu samþykkt mig. Hann setti puttana sína á munninn minn. Óli sagði að þannig samþykkir hann fólk. Mér fannst eins og hann hafi þarna áttað sig á að ég er ættmenni, ættmóðirin ef við viljum vera dramatísk og látið mig vita að já, hann þekkir mig loksins og samþykkir. Amma er ekki að fara neitt.

Lágpunktur vikunnar var í gær þegar ég kom heim úr vinnunni og var bara eitthvað svo þreytt. Vegan maskarinn hafði lekið niður á göngunni heim, hann var ekki þar sem hann átti að vera sem er á augnhárunum heldur sunnar. Hrukkurnar í kringum munninn héngu einhvern veginn og æ, bara einhver þreyta í gangi.

Verkefni vikunnar átti nú að vera ofur einfalt. Gat ekki ímyndað mér að það að kaupa nýjan reykskynjara fæli í sér að þurfa að velja á milli einfalds gamaldags reykskynjara eða þá snjall reykskynjara. Snjall! Meikar samt alveg sens að fá þá tilkynningu í símann ef maður er ekki heima og eitthvað kemur upp á. Keypti hann sem sagt, snall reykskynjarann.

Allavegana, finnst ég frekar rík. Það er búið að vera mikið fjölskylduþema í vikunni, hlutverk mitt sem móðir og amma er búið að vera allt að því yfirþyrmandi. En bara allt að mörkunum, fór ekki yfir mörkin og náði að njóta vel samvistanna með fjölskyldunni í vikunni.

Namaste.

Lífið er bara nokkuð gott

Er byrjuð í einkaþjálfun sem hefur reynst alger game changer í mínu lífi. 

Passaði að velja einkaþjálfara sem er líka osteopati og veit allt um hryggskekkjur og brjósklos. Er búin að finna þvílíkan mun á bakinu mínu og líðan. Líkaminn er bara allt annar. Vildi óska að ég hefði gert þetta fyrr. Sá líka þegar ég fór í sund í vikunni að ég er komin niður í 63 kg allt í einu og frekar flott bara. Er mjög sátt. Aðal bömmerinn er að það er bara einn tími eftir. Svo er það eftir mér komið að halda þessu við.

Verkefni vikunnar var eins einfalt og það gerist. Samt er það búið að taka mig margar vikur að koma mér í að gera það. Það var einfaldlega að ryksuga bílinn. Sko. Hér áður fyrr fór fólk á bensínstöðvar með 100 kalla og ryksugaði bílinn þannig. Þessi menning virðist dauð eftir því sem ég kemst næst. Var nokkurn tíma að finna út að það eru bílaryksugur sem virka hjá Löðri í Kópavogi. Var bara heillengi að koma mér í þetta en það tókst sem sagt. Sá að bílamottan bílstjóramegin er eiginlega gatslitin og næsta verkefni er þá að finna nákvæmlega svona sem passar í Nissan Pathfinder. Hún nefnilega smellist í ákveðið dúbb í bílnum og er held ég merkst Nissan. Mon diau..

Hápunktur vikunnar var klárlega þegar ég var í búningsklefanum í sundi og fannst ég bara frekar flott!

Lágpunktur vikunnar var í gær þegar Emilía mín þurfti að horfa upp á hvernig ég fer út úr nuddrýminu. Þarf að taka allt úr sambandi og marg tékka hvort allt sé ekki örugglega úr sambandi. Ekki eins og það geti kviknað í út frá saltlampa en .... :/

Ætla að fara rokka þennan dag (gera allt á check listanum sem er oddly satisfying.)

Namaste.

 

Out with the old, in with the new

... with me being the old.

Er að finna að flestum vígstöðvum lífs míns eru ungu konurnar að taka yfir. Hvort sem það er í bókhaldinu hjá Svani eða í nuddinu. 

Hann er búinn að fá sér bókara. Hún er yngri en ég og kann betri og skilvirkari leiðir. Hvað ég geri þá á morgnana veit ég ekki en kannski fer ég að gera reikninga. Sagði hann.

Hún vill dagana mína. Er með fleiri kúnna. Er yngri, hraðari, skilvirkari. Veit ekki alveg hvernig ég að höndla þetta. Er rólega týpan. Ok, hún vill kannski bara einn af þeim en smá skellur samt.

Vikan byrjaði hræðilega en er að enda ljúflega. Ákvað að Pee into the wind og fór í blóðprufuna. Varð kvíðin, grét allan tímann og var svo í kvíðaástandi fram á þriðjudag þar sem verkurinn fór ekki og hélt fyrir mér vöku. Eftir því sem ég kemst næst var þetta einhvers konar egglos og blaðra sem blæddi inn á í móðurlífinu eða eitthvað. Allavegana, líður miklu betur. Þetta er allt að koma.

Hápunktur vikunnar var þegar ég var í einkaþjálfun í World class á þriðjudaginn og lyfti þyngra en ég hef nokkru sinni lyft. Eftir sirka 25 ár í World class lærði ég loksins á tækin og hvað er best fyrir mig að gera og hvaða tæki eru best fyrir mig. Leið svo vel eftir æfinguna að ég finn ennþá hvað þetta var gott fyrir mig og það er föstudagur. Er alveg á leiðinni að fara gera þetta aftur. Er að fara í ræktina.

Lágpunktur vikunnar var klárlega þegar ég fór að gráta þegar ég var að pee into the wind. Only my biggest fear samt.

Fékk svo að vita niðurstöðuna í gær og það er bara allt í fína Bína með örvæntingarfullu húsmóðurina okkar. 

Verkefni vikunnar að fá mér sensible augnháralengingar. Fann loksins lengingar fyrir viðkvæm augu eins og mín og yes, I did it. Líður smá kjánalega en var bara farið að líða eins og lúða með ómáluð augun alltaf. Langaði að gera eitthvað fyrir andlitið, poppa það aðeins upp, en kannski var þetta of mikið. 

Við lítum ekki allar vel út ófarðaðar.

Namaste.

 

 

Pee into the wind

"If you´re scared of heights go to the top of the building.." Elsku Joey í Friends.

Fyrir sirka 15 árum skrifaði ég mjög dramatíska færslu hér um hvað það hefði kostað mig að hafa þurft að fara í blóðprufu þegar ég var ófrísk af Stefáni. Minnir að það hafi verið einhvern veginn svona (annars er færsluna að finna árið 2007 líklega.)

Tvö kvíðaköst

Eitt geðsýkiskast

Ein svefnlaus nótt

Einn veikindadagur í vinnunni.

Jesús. Það er ekki auðvelt að vera með fóbíu. Ég fór sem sagt til læknis á mánudaginn og hann vildi senda mig í rannsóknir, þvagprufu og blóðprufu. Hann sá að ég hafði ekki farið í blóðprufu síðan 2015 og furðaði sig á því. Ég útskýrði málið og þessi elskulegi læknir sýndi mér skilning og sagðist geta bundið um hnútana þannig að ég gæti fengið að koma til þeirra á heilsugæslustöðina og fengið að liggja fyrir og eftir og fengið róandi. 

Sko.

Ég nenni ekkert að vera svona. Leiðinlegt að þurfa fórna heilum degi í ótta. Það hefur sem sagt gerst í hin skiptin að það hefur liðið yfir mig og svona. Það er hræðilega leiðinlegt. 

Pee into the wind Svava!

Vikan var góð. Núna er frídagur sem er mjög gott að því að ég er eiginlega frá vegna túrverkja. Þeir koma á nóttunni. Byrjaði síðustu helgi. Ég sem ætlaði í gelluyoga hjá einni sem mig hefur langað til lengi. En ástand mitt býður ekki upp á það.

Hápunktur vikunnar var í gær þegar ég var að heila. Elska bara svo mikið mómentið þegar ég kemst í beintengingu og almættið flæðir í gegn og vinnur í gegnum mig. Það gerist ekki alltaf. Nuddið þar á undan var beinlínis vandræðalegt af því að ég var með nýjan síma (iphone) sem ég kann ekki almennilega á og gat ekki tengt hann við bluetooth gaurinn svo að þegar ég setti á flugstillinguna hætti tónlistin. Sem betur fer var þetta fastakúnni og við spjölluðum og svo hjálpaði hún mér að tengja dæmið svo að ég gæti sett á flugstillinguna. Já og tifandi klukkandi truflaði líka það nudd. Hérna er hann. Lágpunktur vikunnar sem sagt. Fyndið að alltaf er þetta á miðvikudögum. Oft. Bæði hápunktur og lágpunktur vikunnar. 

Verkefni vikunnar tókst ekki vel til. 

Er frekar einföld kona. Þegar mig vantar nærbuxur fer ég í Lindex. Í öll síðustu skipti sem ég hef farið í Lindex hefur ekki verið til mín stærð sem er mjög einfaldlega Medium. Samt fer ég þangað aftur þegar mig vantar nærbuxur. Verkefnið vikunnar var sem sagt að kaupa nærbuxur og sokka. Var heldur ekki ánægð með sokkana. Þeir þurfa að vera ökklasokkar svona hvítir íþrótta en þeir sem ég keypti voru of þunnir. 

Ég veit flestar aðrar konur elska að versla og hefðu farið í aðrar búðir og blablabla. Mér hins vegar leiðast svo mikið búðir og Kringlan að ég þurfti stuðningsfulltrúa með mér. (Djók, ekki djók.)

Er auðvelt að vera ég? 

Nei.

Namaste

 

Teenage angst

Guðirnir eru góðir.

Unglingurinn minn (bráðum 16 ára) er ekki með neitt á veggjunum í herberginu sínu. Oft er ég að hvetja hann til að finna einhver fótboltaplaköt eða eitthvað en hann bara: "hvar?"

Ég var hins vegar allt annað mál. 

Veggirnir voru málaðir í litum djöflana; rautt og svart og málað á vegginn með svampi. Það var í tísku í kringum 1993 að svampmála. Ákveðinn stíll. Síðan voru fullt af plakötum með menningu þess tíma. Mikill karakter í öllum þeirra. Flest úr tímaritinu i-D sem var það svalasta sem ég vissi um á þessum tíma. Fyrir utan Stussy. Mikið teenage angst í gangi með léttúð samt. 

Úff, svakalegt tímabil.

Mikið er ég þakklát fyrir unglinginn minn sem stendur sig svo vel í lífinu. Núna er allt að gerast. Hann er í lokaprófum og er að klára 10. bekk. Næsta vetur verður hann líklega kominn í menntaskóla.

Allavegana, er að elska vikurnar núna. Það gerir svo margt og mikið gott að vera með 4ra daga vikur þökk sé öllum þessum frídögum. Varð reyndar smá ringluð á miðvikudaginn og hélt að það væri laugardagur. Mín ástkæra móðir leiðrétti misskilninginn.

Vikan var létt og góð. Alveg eins og ég vil hafa þær. Hef aldrei verið mikið fyrir álag. 

Hápunktur vikunnar var á miðvikudaginn í hot power yoga tíma. Veit ekki hvort þið hafið farið í svona tíma en hann var meira en klukkutími og ég var bara svo ánægð að hafa lifað hann af!

Lágpunktur vikunnar var í gær þegar ég fór í Kringluna að útrétta og leið eins og lúða af því að ég er alltaf í sömu útivistarbuxunum (þær eru þægilegar) og sömu skónum (pússaði þá reyndar aðeins upp í gær.) Verð að step up my game af því að jú, þið heyrðuð rétt. Gelluseason er að byrja. 

Verkefni vikunnar var að undirbúa bæði húsmæðraorlof í formi sumarbústaðaferðar með besties og afmæli Styrmis Orra með því að gera rétti sem ég síðan frysti.

Whoop whoop!

Namaste.