These are the days of our lives

Það voru undur og stórmerki í lífi örvæntingarfullu húsmóðurinnar okkar síðasta sunnudag þegar hún hélt líklega síðasta barnaafmæli ævi sinnar. 

Barnið er orðið táningur og það er hugsanlegt að hún kríi út líka afmælisboð á næsta ári en það er fermingarárið og hugsanlega lætur hún sér það nægja. Allavega. Mér reiknast til að ég hafi haldið um 40 barnaafmæli fyrir börnin mín. Þetta er alltaf meira en að segja það og streitustigið oft ansi hátt síðustu tvo tímana fyrir veislu. Mig minnir að það hafi verið í fyrra eða þar á undan sem ég var slöpp og orkustigið var í lágmarki. Það var erfitt.

Ég man að það var ansi stórt og mikið fyrir mig þegar ég þurfti ekki lengur að sækja á leikskólann kl 16. Það var svo yfirgnæfandi hlutur af lífinu í 15 ár að þurfa alltaf að sækja á þessum tíma. 

Vikan var fræðandi. Byrjaði hana vel úthvíld og til í allt þegar ég henti vanhugsuðu skíti inn á Bluesky (eins og Twitter) varðandi borgarlínuna og allt varð vitlaust (eða svoleiðis.) Get sjálfri mér um kennt því ég gat sagt mér að það að segjast ekki vilja borgarlínu félli illa í kramið hjá vinstra fólki. Ástæðan er algerlega sjálfselsk því að þó að Miklubrautargöng hljómi skynsamlega og vel þá gerir sjálf framkvæmdin það ekki þar sem ég bý við Miklubraut. Hef sjaldan kynnt mér málin eins vel fyrir kosningar og núna og rýndi vel í það sem flokkarnir leggja áherslu á í samgöngumálum. 

Veit núna að borgarlínan og Miklubrautargöng eru alls ekki sami hluturinn. Henti vanhugsaða skítinu fyrst inn og kynnti mér málin svo í framhaldi af því. Borgarlínan hljómar mjög vel og hlutar hennar eiga vissulega rétt á sér en með henni er vissulega verið að þvinga fólk úr bílunum og ég skil vel að það gangi ekki fyrir alla.  

Endaði á að kjósa Framsóknarflokkinn í fyrsta skiptið á ævinni enda er Einar með fæturnar á jörðinni og er í miðjunni en ekki galhoppandi til hægri eða vinstri með einhverjar öfgar. Það má endurskoða allt og hlusta á það sem fólkið vill. Það má til dæmis bakka með áformin á Suðurlandsbraut og svo framvegis.

Hápunktur vikunnar var í gær þegar ég sveif um hjólastígana á nýja rafmagnshjólinu mínu alla leið út á Álftanes. Það bæði frelsandi og gaman. Fann til mín þegar ég var stundum á miðri götu svífandi niður hana. Já eða upp sem var auðvitað lítið mál með því að ýta á turbo;)

Lágpunktur vikunnar á mánudagsmorguninn þegar ég var miður mín vegna viðbragðanna við vanhugsaða skítinu. Það voru tvær konur sem settu athugasemdir inn. Hvort það vægi virkilega þyngra (geðheilsan mín) en bættar samgöngur fyrir alla á höfuðborgarsvæðinu. 

Var eiginlega miður mín vegna þessa alla vikuna og hlakka til að komast úr þessari borg óttans á eftir með góðum konum.

Namaste.

Mjög athyglisverð ...

 ... helgi að baki.

Ég var eiginlega vikuna að jafna mig eftir helgina. Kannski ekki alveg. En samt. 

Fór í svo athyglisvert matarboð/sextugsafmæli á laugardagskvöldið í Njarðvík að ég er ennþá að hugsa um það. Þær voru svo skemmtilegar Sigga frænka hans Svans og Eva vinkona hennar. Konur rétt rúmlega þrítugar. Eva var sérstaklega skemmtileg og kom skoðunum sínum svo fallega til skila. Enn og aftur hitti ég manneskju sem finnst cacao seremóníur harkalega glataðar og jóðlið í kringum það fáránlegt og meðaumkunnarvert. 

Það kemur mér svo mikið á óvart hvað margir, liggur við, hata eitthvað svona. Svo sterk mótstaða. Ég skil það ekki. Þar sem ég hef áður verið stimpluð sem djúpt sokkin í cacao-ið ákvað ég að þegja bara. Brosti reyndar og hafði ótrúlega gaman af þessum litríka karakter sem jú fer í svett en þolir ekki jóðlið í kringum það. Fékk mér smá rauðvín með Óla og Þurí og mætti svo vel stemmd í 3ja ára afmælið hans Styrmis Orra á sunnudeginum.

Hvað þessi strákur er fallegur og flottur. Hann krúttaði yfir sig í spiderman búning sem hann fékk í afmælisgjöf þar sem hann setti sig í stellingarnar og já, gríðarlega vel heppnað afmæli. Sólin var með okkur og hægt var að vera út á palli og í garðinum hjá foreldrum Katrínar. Dásamlegt. 

Vikan var skrítin vegna þess að Guðrún Halla var ekki heima. Hún var í Vatnaskóg með árganginum sínum (7.bekk) svo það var tómlegt í kotinu og mamman saknaði dóttur sinnar. Hún vill halda upp á fjölskylduafmælið sitt á sunnudaginn en eins og alltaf í maí er óvíst með mætingu á fólkinu. Skil það nú bara ágætlega reyndar. Er líka óviss hvað komast margir fyrir í "nýju íbúðinni" svo þetta kemur bara allt saman í ljós. 

Hápunktur vikunnar var á miðvikudaginn þegar ég átti góðan dag. Fór og hitti atvinnulífstengil í Virk í fyrsta skiptið. Núna á að skófla manni út á vinnumarkaðinn. Er samt þarna út ágúst nema ég fái vinnu fyrr. Kem til með að hitta hana vikulega svo núna fer nú eitthvað að gerast kannski. Væri ótrúlega sátt með að vera komin með eitthvað sem mér líður vel með fyrir haustið.

Lágpunktur vikunnar var í gær þegar ég var eitthvað lítil í mér. Það rættist samt úr deginum og ég fór til kíró á nýjan stað og yogað mitt sem alltaf bjargar öllu. Haldreipi mitt í lífinu ef ég á að vera mjög dramatísk. Núna erum við í yoganu svo mikið að spá í kosningamiðstöðinni sem er komin tímabundið á jarðhæðina í Skipholtinu. Viðreisn. Þar sem Gummi og Talya fylgjast lítið með fréttum og samfélagsmiðlum eru þau að spyrja okkur hvað þessi flokkur stendur fyrir. 

Það eru reyndar stórfurðulegar og drastískar breytingar í mínum pólitíska haus. Eitthvað sem ég myndi seint viðurkenna fyrir öðrum og kemur sjálfri mér mikið á óvart. 

Vil ekki tala um það.

Namaste.

Aftur..

 .. rugluðu frídagar mig. 

Jú, það var föstudagur í gær en það var frídagur. Ætli mér líði ekki þá eins og sé laugardagur. Fyrst það var 1.maí skilaði ég inn uppfærðu skjali til bókarans varðandi nuddið og bara steingleymdi að blogga. 

Þessi helgi er frekar annasöm sem er nú bara hressandi. Sextugs afmæli í kvöld hjá flottri mágkonu og fjölskyldunni hennar. Það segir svo margt um fólk þegar manni líður vel með því og þau eru þannig. Gulls ígildi. Elsku Styrmir minn verður 3ja ára á morgun sunnudaginn 3.maí. Það var handboltamót þessa helgi líka sem mér fannst á tímabili dáldið mikið af því að ég var á Ormstungu í Þjóðleikhúsinu líka á fimmtudagskvöldið með Óla mínum. Það bætti ekki úr skák að það gekk ekkert sérstaklega vel hjá stelpunum og það endaði með tapi í öllum leikjum. Það getur verið erfitt. 

Guðrún Halla er frekar svekkt með okkur foreldrana að vera ekki búin að kaupa Vals fatnaðinn fyrir mótið í sumar. Það er bara frekar mikið álag heima. Varð hugsað til Hliðsness í nótt þegar götuhreinsibíll vakti mig. Það er stundum mikil veisla að sofa beint upp við Miklubraut. Mikið um mótorhjól 1.maí til dæmis. Ef ég væri í Hliðsnesi væri ekki álag og svo sannarlega enginn götuhreinsibíll um miðja nótt. 

Samt langar mig ekki beint til að flytja í úthverfin. Frekar svona fá frí frá borgarlífinu stundum. 

Svo er pökkun fyrir Vatnaskóg beint eftir afmælið á morgun. Það verður svo skrýtið að hafa enga Guðrúnu Höllu í nokkra daga. 

Það var mjög gaman á mæðginadeiti með Óla mínum. Við fórum á Caruso sem við komumst að að er ítalskur staður. Auðvitað. Ormstunga var svo ævintýri út af fyrir sig:) Vorum á aftasta bekk sem setti smá strik í reikninginn. Hefði viljað sjá sýninguna í betra návígi. Það er líka alltaf smá vonbrigði þegar búið að hrósa sýningu í hástert. Hún sé einfaldlega ÆÐI. Væntingarnar eru þá kannski of háar. Eitthvað svoleiðis. 

Namaste.

Þessi vika...

 ... flaug áfram. Flaug.

Ringlaðist vegna frídagsins í gær. Rauður dagur á fimmtudegi. Fattaði einhvern veginn ekki að það væri föstudagur í dag og bloggaði þess vegna ekki í morgun. Þetta var virkilega góður frídagur í gær. Sumardagurinn fyrsti. Fann sterkt hvað allir voru í góðu skapi og eru ennþá í dag. Fólk brosir og brosir til mín. Mikið gaman, mikið fjör. Fór í Sundhöllina í gær og þar var stemmning. Það opnaði ekki fyrr en kl 11 og við vorum nokkur sem biðum kurteis fyrir utan. Starfsmaðurinn sem kom út var svo hress. Kona komin í sumarmúnderinguna; stuttbuxur og bleikan bol. Allir brosandi og slakir og sáttir í sundi. Fann líka þegar ég fór í Laugar áðan að allir voru í góðu skapi og brosandi. 

Allt svo leikandi létt:)

Vikan var eins og rússibani. Dáldið eins og kona á breytingarskeiðinu. Maður veit ekki alveg hvar maður hefur hana. Var leikandi létt fyrrihlutann svo kom dýfa á miðvikudeginum þegar ég var að fara í atvinnuviðtal eða svoleiðis. Vissi að um væri að ræða líklegast kvöld- og helgarvinnu. Það var kannski þess vegna sem ég var kvíðin. Ekki alveg tilbúin til að fórna kvöldunum og helgunum. Var í rauninni fegin þegar kom í ljós að þetta var ekki match. Þetta var swipe left. Passaði bara ekki og var ekki það sem ég hélt að þetta væri. Hélt að þetta væri dvalarheimili en þetta er eitthvað annað. Þær sáu líka að ég myndi ekki passa þarna inn. 

Hápunktur vikunnar var þegar ég var loksins búin að jafna mig á miðvikudaginn eftir viðtalið og ákvað að bjóða grasekklinum bróður mínum heim í rauðvín og grill. Það var gott og gaman að fá þá feðga Tryggva og Óðinn Pind í heimsókn. Þeir eiga heima hinum megin við götuna svo auðvitað! Konan hans er í Víetnam um þessar mundir á vegum EFTA nefndarinnar. Frekar svalt. 

Lágpunktur vikunnar var þennan sama dag, miðvikudag þegar ég var bara hrædd lítil mús á leiðinni í atvinnuviðtal. Hef ekki verið á vinnumarkaðnum í nokkur ár núna og er orðin eitthvað lítil í mér. Veit ekki einu sinni hvort ég höndli 100% vinnu. Held bara alls ekki svo ég er svona frekar að leita að 40% vinnu eða eitthvað. Leiðinlegt að finna fyrir kvíða. Ansi langt síðan síðast. Var að reyna að sjá fyrir mér að mæta á helgarvakt kl 08 þegar ég kemst ekki einu sinni í yoga kl 10 á laugardagsmorgnum. 

Hvað get ég sagt? Við erum B týpur og finnst gott að vakna í rólegheitunum um helgar. Engan asa. Finnst til dæmis óbærilegt að mæta með Guðrúnu Höllu á handboltamót um kl 09 svo ... já.

Konan er ennþá frjáls. 

Eða svoleiðis.

Namaste.

Beverly hills 90210

Mig rak í rogastans þegar Jón Brynjar bróðir sendi mér sms um að Beverly hills 90210 unglingaþættir lífs míns væru komnir á Sjónvarp Símans. 

Er í gegnum árin búin að leita að þessum þáttum alls staðar, á öllum streymisveitum með engum árangri. Loksins. Takk kærlega Sjónvarp Símans! Það er svo skrýtið að mér finnst eins og þessir þættir hafi gerst í gær. Elskaði þá svo mikið þegar ég var unglingur að það hálfa væri nóg. Fyrirgefðu elsku mamma fyrir að hafa æst mig þegar ég þú gleymdir í eitthvert skiptið að taka upp fyrir mig. Á videotækið þar sem hver þáttur var tekinn upp á eftir öðrum.. 

Það sem er verið að sýna núna eru alveg fyrstu þættirnir. Season 1. Er að rýna í bakgrunninn í sumum senum og já.. þetta er alveg fyrir svolitlu síðan. Hvernig fólk skreytti bakgrunninn þarna er næstum útí 80's. Þá er ég að tala bæði á heimili Kelly til dæmis og kaffihúsum og fleirum stöðum. Peach pit er samt alltaf flottur. Merkilegt miðað við að þættirnir gerðust í gær. Eða svoleiðis. Mér finnst þeir eldast vel. Eins og til dæmis Brenda klæðir sig er ennþá flott að mínu mati. Þættirnir voru teknir upp á árunum 1990 til 1995 fyrst. Svo aftur á árunum 1998 til 2000.

Er að reyna að muna ekki að Luke Perry, sem leikur Dylan er dáinn. Sömuleiðis Shannon Doherty sem lék Brendu. Elska að horfa á þessa þætti. Feels like home. Man eftir flestum af þeim og lifi mig alltaf jafn mikið inn í þá. Grét til dæmis í sófanum eitthvert kvöldið í vikunni þegar faðir Dylans dó með vofleglegum hætti. Beverly hills 90210 eru algerlega unglingsárin mín. Tíminn er svo skrýtinn, jú það eru sirka 33 ár síðan en damn hvað þeir eldast vel þættirnir. 

Í síðasta þætti var Kelly að taka megrunarpillur til að vera grennri, Andrea var að reyna að ná viðtali við Dylan fyrir skólablaðið og Brandon var kominn með gambling problem. David var að reyna að meika það sem tónlistarmaður með misjöfnum árangri og Dylan langaði að drekka frá sér vandamálin. Sem betur fer fékk hann að vera hjá Walsh fjölskyldunni til að ná áttum. Kom í ljós að mamma hans var í leynilögreglunni (held ég) og pabbi hans líka. 

Fyrir mér eru karakterarnir á undarlegan hátt vinir mínir. Unglingsárin mín. Æskan mín. 

Ég fylgist með eftirlifendum á Instagram. Steve Sanders (Ian Ziering) virðist seigastur af þeim. Sá að hann var að keppa í Dancing with the stars um daginn. Kelly Taylor (Jennie Garth) líka. Donna Martin (Tori Spelling) virðist ekki vera á góðum stað án þess að ég hafi kafað djúpt í málefni hennar. Ef ég skil þetta rétt þá hefur hún tapað auðævum sínum til fyrrverandi mannsins síns sem virðist hafa spilað með hana. Hún er fjögurra barna móðir og lenti í bílslysi um daginn en það er allt í lagi með hana og börnin. Hún er dóttir framleiðanda þáttanna (faðir hennar var Aaron Spelling) og átti mikinn pening. Leiðinlegt að þá er hún dáldið eins og karakterinn sinn Donna í þáttunum sem trúir á það góða í öllum. Lendir svo í manni sem nýtir sér það. 

Namaste.

heimkoman

 Tene var góð.

Eins og alltaf. Fórum á sömu staðina og vanalega í smá nostalgíu. Suka á Fanabe ströndinni, Luuma veitingastaðinn þar fyrir ofan og fylgdumst með breytingunum á ströndinni þar. Hún var aðeins öðruvísi núna. Vorum á amerísku ströndinni á hóteli sem við höfum ekki verið á áður H10 eitthvað, náðum því aldrei almennilega. Conquistador. Erfitt fyrir okkur að segja þetta orð, tíhí.

Heimkoman var hræðileg. 

Innra með mér er húsmóðir sem ljómar alls ekki. Auðvitað var allt út um allt út af framkvæmdunum. Flísari hafði verið að vinna í íbúðinni á meðan við vorum úti og já, í boði var klósett sem jú virkaði en mátti eiginlega ekki setjast á almennilega. Svanur er alltaf svo ofboðslega dramatískur með allt svona, sagðist þurfa að endurflísa kassann eða eitthvað ef það yrði sest of fast á það. Er eitthvað meira niðurlægjandi og auðmýkjandi en að komast ekki á klósettið heima hjá sér?

Auðvitað fór ég beint til mömmu (og pabba.) Hér hefur mér liðið æðislega vel. Hef sofið eins og steinn. Langar alls ekkert heim. Það er samt ekki eins og ég geti vælt yfir því að það sé ekkert að gerast. Það er bókstaflega allt að gerast. Flísarnar komnar á, parketið komið á, Stefáns herbergi tilbúið fyrir utan hurðina. Baðherbergið allt að koma skilst mér. Vona svo innilega að skápurinn og vaskurinn komist í gagnið í dag því það þýðir að ég get komið dóti aftur fyrir. Núna er allar baðherbergisvörur inn í stofu og allt út um allt. Þvottavélin farin aftur fram á gang og kaosið yfirþyrmandi. 

Í gær bjó ég basically í bílnum og passaði að pissa þar sem ég var rétt áður en ég kom heim. Það var ekki hægt að vera heima. Ég sótti actually um vinnu í gær á vinnustofu hjá Virk. Í allri þessari atvinnuleit er þetta í fyrsta skiptið sem ég geri það. Hehe.. sumir neurodivergent að passa upp á orkuna sína. 

Held ég fari aftur heim í dag þó mig langi það alls ekki. Mér finnst mjög erfitt að funkera í öllu þessu drasli. Held ég fái mér bara prosecco eða eitthvað.

Chiao bella,

Namaste

Hvítvínskonan

Skrýtið að skipta um persónuleika í sama lífinu.

Ég kynni fyrir ykkur tadada: hvítvínskonuna. Áður stundaði ég stíft yoga í fríum. Núna er ég svo stíf að ég kemst ekki almennilega í downward dog en það er allt í góðu því bráðum verður klukkan wine o’clock.

Áhugavert.

Betra að sumu leyti. Helps to give less fucks I guess.

Annars er ég farin að hafa áhyggjur af því hvað öllum er sama heilt yfir. Það verða einhverjir að standa á sama. Annars gengur dæmið ekki upp.

Læt þetta duga í bili. Ekki gaman að blogga í símanum.

Namaste.

Jæja Ísland

 Þetta hefur verið skrýtinn vetur. 

Fyrst froststillur og flott veður í janúar og febrúar og svo mætir mars eins og miðaldra kona á breytingarskeiði. Góð stundum en hálkublettir og skafrenningur og svo núna brjálæðiskast. Hún er búin að gera alla svo hrædda að vegum er lokað til hennar og frá. Það er beðið eftir að hún rói sig. Það á víst að gerast upp úr hádegi. 

Hef nú ekki tekið menopausal rage í langan tíma en datt þetta bara í hug í stjórnleysi stormsins hérna fyrir utan. Það er nú bara notalegt að vera inni og fylgjast með en þessi kona (ég) þarf að halda ró minni eins og endranær í dag og muna eftir öllu sem þarf að muna eftir. 

Mér finnst erfitt að hugsa þegar baðherbergisdót og skrifstofudót og núna ræstiskápurinn er í óreiðu á öðrum stað en það á að vera. Jú, þessi íbúð er hugsanlega orðin of lítil fyrir okkur en öryggisfíkillinn er ekki að fara selja þegar markaðurinn er óstöðugur og við líka. Atvinnumál og svoleiðis.

Það er markmið ársins 2026 að fá mér fasta atvinnu. Dreymir um hlutastarf á stað þar sem mér líður vel og fólkið er gott. Kannski ég sendi tvo tölvupósta í dag varðandi það. 

Það er smá óþægilegt að eiga flug á milli hríða. Er að reyna að hugsa ekki um það. Það er líka skrýtið að það verður flísari hérna sem jú er myndarlegur en ég þekki ekki að vinna hérna á meðan við erum úti. 

Annars verð ég að hrósa mér fyrir að vera ekkert búin að kvarta yfir að hér hefur ekki verið baðherbergisvaskur síðan í október og núna er engin sturta heldur. Er búin að kynnast sturtunni í World Class Kringlunni vel undanfarna daga og er með ábendingu til ræstingastjórans ef slíkur er þarna. 

Verkefni vikunnar var að höndla aðstæður heima með allt gjörsamlega út um allt og Svanur alltaf að finna leiðir til að búa til meiri óreiðu. Núna er hann að tala um að rífa niður baðherbergisskápana (í dag, degi fyrir brottför.) Hvar það dót á að fara veit ég ekki. Ofan í ferðatöskurnar?

Hápunktur vikunnar er stöðugleikinn sem ég finn fyrir núna þrátt fyrir draslið heima.

Lágpunktur vikunnar var líka núna þegar ég sé að ég er skráningarbanni í world class. Yogatími hefði verið mjög gefandi. Er orðin háð þessum infrarauða sal. 

Líka, fyrir konu sem er oftast með allt á hreinu er svekkjandi að hafa gleymt að afskrá mig úr yogatíma og vera í skráningarbanni eins og óþekkur krakki.

Namaste. 

Flækt

 Er búin að vera mjög flækt þessa vikuna. 

Það er ekki öllum gefið að búa á tveimur stöðum og vera með dótið sitt út um allt. Vera út um allt og hvergi. Ástandið heima er á mínum mælikvarða skelfilegt. Mæli það með því að um leið og ég kem heim stöðvast hugsun og ég get ekki hugsað. Funkera ekki í clutter og kaos. 

Það er verið að vinna í tveimur rýmum núna, baðherginu og nýja herberginu hans Stefáns. Þetta er ótrúlega mikið rask fyrir mig. Finnst þetta svo óþægilegt. Get ekki verið til í þessari óreiðu. Það er líka eitthvað við að hafa endalausa karlmenn vaðandi um allt í öllu draslinu sem ég get ekki. 

Fór þrisvar í yoga í vikunni til að vera einhvers staðar sem mér líður vel. Það hjálpaði. Það er líka ómetanlegt að vera hjá foreldrum mínum. Hér er kyrrð og hér er friður. Hreint og engar framkvæmdir. 

Fór á tvo fundi á vegum Virk í vikunni. Það er verið að loka mér. Brátt telst ég endurhæfð og á að fara vinna. Allt í lagi með það. Er svo mikið að vanda mig að vernda sjálfa mig fyrir álagi og áreiti. Langar svo að lenda á réttum stað þar sem mér líður vel. Þá gæti þetta virkað. 

Fór að sjá Krishna das í Hörpunni á þriðjudagskvöldið. Hátíð hippanna svo sannarlega. Árshátíð andlega heimsins á Íslandi. Þarna voru allir sem halda rými fyrir seremóníur og yoga. Æðislegt. Skemmti mér vel. 

Er að fara senda ferilskrána mína á einn stað á eftir. Mannaði mig upp í að hringja eitt símtal í gær til staðar sem ég hef haft augastað á. Það gæti gengið á báða bóga.

Verkefni vikunnar var ... ha? Veit varla hvar ég er eða hver ég er rn.

Hápunktur vikunnar var að sjá sjálfan Krishna das á sviðinu í Hörpu og kirja með honum. Háandleg stund.

Lágpunktur vikunnar var samansafn af imposter syndrome heima. Það er skítt að líða ekki vel heima hjá sér. 

Jú, það er kominn hiti í gólfin inná baði og þetta verður örugglega geggjuð sturta. Við fáum líka handklæðaofn. En damn it það eru búnar að vera fokking framkvæmdir síðan í október. Giska án djóks að það hafi sirka 200 karlmenn í það minnsta komið og skoðað eitthvað og unnið heima. 

Þetta er komið gott. 

Namaste.

Allt í fína Bína

 Ef þessi vika væri súlurit væri það einhvern veginn þannig að ég var svo stressuð á þriðjudaginn að ég hálf skalf þegar ég kom í aðstöðuna. Mjög mikið álag heima. Svo flutti ég mig yfir til mömmu (og pabba) og hef verið stöðug og hamingjusöm allar götur síðan:)

Var án djóks komin með einhvers konar fiðring í hausinn. Já, ennþá framkvæmdir. Núna baðherbergið. Fyrst var baðkarið fjarlægt og steinaveggurinn tekinn niður og svo ráðist í að bora fyrir nýju sturtunni og koma hita í gólfin inn á WC. Svanur hefur verið svo hugulsamur að senda mér myndir af ástandinu og það lætur mér líða verr og vilja alls ekki fara heim. Svo sagði Guðrún Halla í gær að allt væri rykugt heima og (nýju) gólfin skítug. Jeij. 

Kennslan í Mími kom í raun á góðum tíma. Rosalega gott að vinna smá og gera eitthvað svona til tilbreytingar. Ég var ekkert stressuð. Sem betur fer er þetta gott fólk í tímunum hjá mér. Held mér liði alls ekki vel ef þetta væru Íslendingar eingöngu sem ég væri að kenna. Þeir eru einhvern veginn dómharðari og óvægnari?

Verkefni vikunnar var eiginlega að lifa hana af. Asnalegt að skrifa þetta þegar það er fólk í heiminum sem þurfti actually að lifa hana af. Annars var það kennslan í Mími. Hún var einhverja hluta létt. Auðveld. Í fyrsta skiptið.

Hápunktur vikunnar var í gær þegar ég nemandi sat eftir og talaði við mig. Spurði út í mig og hvort ég kæmi ekki örugglega aftur. Gaf mér svo smá gjöf (nammi frá Tælandi) og gaf mér svo faðmlag og hrós. Það var gott í sálina. Mig langar til Tælands núna. 

Lágpunktur vikunnar var í gær þegar ég var alveg út um allt. Búandi á tveimur stöðum og í bílnum hennar mömmu liggur við. Ætlaði að fá mér daglega cacaobollann áður en ég fór í kennslu en tækið (ninja booztið) brást mér og allt fór út um allt. Ok, það var eiginlega ég sem brást af því að ég skrúfaði dæmið ekki alveg rétt á. Svo braut ég óvart krukku í einhverjum æsing og það fóru glerbrot út um allt. Mamma þurfti að hjálpa mér eins og ég væri 10 ára krakki!

Annars hef ég verið óvenju létt. Finn líka að fleiri eru það. Vetrardrunginn aðeins farinn að létta á sér og blessuð birtan farið að staldra við lengur. Svo gott.

Namaste.

 

Ansans ári

Þessi vika er búin að vera alls konar. Frekar streitumikil ef ég á að segja satt. Er ekkert brjálæðislega ánægð með þennan vetur sem ákvað allt í einu að mæta á svæðið. 

Guðrún Halla varð 13 ára á miðvikudaginn sem þýðir að ég er ekki lengur með nein börn á mínu framfæri heldur unglinga. Tvo táninga. Það er nú eitthvað. Mér finnst það allavega smá merkur viðburður í mínu lífi. 

Herbergið hans Stefáns er tómt núna eftir að eldhúsinnréttingin var tekin niður síðustu helgi en það þarf að vinna heilmikið í því. Það er búið að plasta það eftir kúnstarinnar reglum og núna getur maður labbað inn í það með að opna það í rennilásar U-i. Dáldið eins og að labba inn til einhvers sem er í einangrun eða eitthvað. 

Ég er farin að stressa mig á næstu viku sem er regla nr 1 í núvitund um að gera einmitt ekki. Er að reyna að hugsa ekki um hana og ignora hana bara. Er sem sagt að fara kenna allt of mikið. Er svo fullkomlega out of my element þegar ég er að kenna. Með meiriháttar ljósfælni og sviðsskrekk og bara allan pakkann. Af hverju ertu ekki búin að finna eitthvað annað þá Svava? ...

Verkefni vikunnar var að hafa samband við Heilsuhælið í Hveragerði að athuga með vinnu. Sé mig dáldið fyrir mér inn á einhvers konar endurhæfingarmiðstöð. Myndi tengja svo vel við fólkið held ég.

Hápunktur vikunnar var á miðvikudaginn þegar við fórum út að borða á Ráðagerði. Finnst ég svo rík að panta borð fyrir 8 manns. Bara við. Fékk svo æðislega máltíð, Ráðagerðis lasagne og Prosecco. Við Emilía skáluðum saman. Þetta var ekkert smá gott. 

Lágpunktur vikunnar var í gærkvöldi þegar þvagblaðran höndlaði ekki að gluggarnir væru opnir í frostinu í yogatímanum. Bölvaði því að hafa ekki fengið plássið (mitt) hjá veggnum. Þá hefði þetta ekki gerst. Var sem sagt of nálægt gluggunum sem voru báðir opnir. Fann að þetta yrði erfitt kvöld og nótt með yfirþyrmandi verki. Poppaði fullt af pillum þegar ég kom heim, kviðurinn blés út eins og hann væri með fótbolta inn í sér (þetta vissi ég að myndi gerast þegar þetta var að gerast.) Sko yogatími er heilagur þannig að maður er ekkert að skipta um pláss eða loka gluggum þegar hann er byrjaður. Þetta var sem sagt sársaukafullt og þjáningafullt og algerlega óskiljanlegt af hverju líkaminn hagar sér svona. Vissi að ef ég færi að reyna að útskýra myndi enginn skilja. (Smá story of my life.)

Namaste.

 

as within so without

Þetta var úr fyrstu sjálfshjálparbókinni sem ég las. Bókin var Hámarksárangur eftir Brian Tracy. Geggjuð bók. Var hugsað til þess sem þar segir meðal annars um hvernig ytri raunveruleiki manns endurspeglar hinn innri. Sem sagt sá sem líður vel og er með allt á hreinu og allt er í fína bína er með allt í röð og reglu. Bíllinn er ekki með neinu drasli inní, heimilið manns er hreint og allt er í ró vegna þess að það er staður fyrir hvern hlut.

Núna erum við búin að vera í framkvæmdum frá því í október og eins og til dæmis í gær upplifði ég að allt væri bókstaflega á hvolfi. Svanur vill jú gera hlutina vel og var því að hræra flísalíminu eða hvað sem þetta heitir með risahræru í risafötu með risavatnsmælidóti. Þeir voru tveir að klára að flísalegga á milli efri skápa og borðplötunnar í nýja eldhúsinu. Allt á hvolfi og búið að vera lengi og hausinn minn eftir því. Átti von á gestum og var undir þrýstingi að mér fannst að færa allt úr gamla eldhúsinu yfir á no time. Það er sem sagt maður að koma á laugardaginn til að taka gamla eldhúsið niður.

Fékk einhvern kvíða og varð bara voða lítil allt í einu. Hún Hólmfríður á bókasafninu sá það kannski. Góð kona. Bíllinn var búinn að vera bilaður í nokkrar vikur svo ég var bíllaus og það var mér einhvern veginn ofviða að fara niðrí bæ og labba með göngufélaganum. Það var líka veður og vatnspollar út um allt. Í fyrsta skipti frá því ég byrjaði í þessu verkefni cancelaði ég hittingnum. Bara var ekki að meika neitt. Langaði að tala við Brian um að ég geti lítið að því gert að hausinn sé á hvolfi vegna þess að íbúðin sé að hvolfi. Það var ekki ég sem ákvað að taka baðherbergið líka!

Það er líka merki um öldrun að það að allt í einu hafi vetur skollið á og mín vildi bara vera heima í örygginu. Svo komu þau, blessað fólkið mitt og hjálpuðu okkur að færa ísskápinn yfir. Katrín, þessi kjarnakona, endurraðaði í ísskápinn svo úr varð betra skipulag. Þvílíkur snillingur. Styrmir minn er botnlaus um þessari mundir. Hesthúsaði í sig skál af bláberjum (sem amma passar að eiga alltaf þegar hann kemur) og smá skyri og svo áttum við langar samræður um mat. Allt frekar dúllulegt. Töluðum mikið um að Styrmir mætti ekki alveg strax fá hnetur, hann er ennþá tveggja að verða þriggja. Hann er svo klár og skyldi þetta fullkomlega. Úr varð að hann fékk nokkur trönuber úr hnetumixinu. Hjartað mitt.

Namaste.

Kaosið ...

 ... náði mér í gær.

Jú, mikill árangur búinn að nást í íbúðinni í vikunni. Svani tókst að láta vatn renna út úr veggnum inní stofu. Sem sagt eldhúsinnréttingin nýja í stofunni er farin að virka. Það kostaði samt einhvern part af geðheilsunni minni. Hér er allt á rúi og stúi og hausinn minn er ekki að höndla það mjög vel. Er farin að dreyma drauma þar sem ég kemst ekki út úr húsum vegna þess að ég finn ekkert og það er of mikið af dóti út um allt. 

Jú, Svanur er mjög duglegur að gera þetta allt en ... það eru flísar út um alla íbúð og við erum ennþá að tannbursta okkur við eldhúsvaskinn. Mér finnst smá sorglegt að við séum að fara gera það í nýja eldhúsinu líka. Væri gríðarlega þakklát ef baðherbergið myndi vera eðlilegt. Með vaski með hillum undir fyrir handklæðin og nýrri sturtu. Hef samt enga þolinmæði fyrir enn fleiri ókunnugum karlmönnum í íbúðinni. Hér voru tveir menn frá Lettlandi allan miðvikudaginn frá kl. 08:40 til 18:00. Mér fannst smá sætt að þeir voru að hlusta á útvarp eða sögur frá heimalandi sínu á lettnesku. Auðvitað. Myndi ég ekki gera það sjálf í útlöndum?

Það bætti enn frekar á kaosið í gær að það var vetrarfrí hjá krökkunum, allir heima, allt á hvolfi og ég hafði líka hluti að gera. Var að fara á námskeið hjá Virk en ég þurfti líka að fara og kaupa flísar í nýja eldhúsið, á millivegginn. Mikið er ég fegin að það er búið. Ég elska ekki búðir. 

Verkefni vikunnar var ... ha? Ég get varla hugsað heila hugsun með heimilið svona. Er með nokkur mjög auðveld verkefni sem gerast bara ekki því ég hef ekki orkuna í þau. 

Hápunktur vikunnar var á miðvikudaginn þegar mennirnir frá Lettlandi voru farnir. Rosalega góð mynd komin á nýja eldhúsið og Svanur og Guðrún Halla fóru í Costco og Stefán var einhvers staðar og allt í einu var ég EIN HEIMA. Það hefur sjaldan verið eins og gott að vera ein heima. Fékk svo mikla yfirþyrmandi vellíðunartilfinningu að ég get ekki fyllilega lýst henni. Horfði EIN á Heated rivalry af því að þessir þættir eru þannig að maður þarf að horfa einn á þá. Smá dónó. Ok, fullt.

Lágpunktur vikunnar var í gær þegar kaosið náði mér. Var komin með kvíðahnút í magann yfir öllu stressinu í manninum. Flísarnar þurftu að skila sér heim. Ég þurfti að fara á námskeið. Tók rosalega margar öndunaræfingar í gær. Öskraði í bílnum stressuð. Þurfti að segja nei við Óla um að koma í mat. Kaosið var of mikið. Komst blessunarlega í yoga þar sem kvíðahnúturinn leystist blessunarlega upp. Dreymdi rosalega raunverulegan og erfiðan draum sem var um fimmtugsafmælið mitt. Ég hafði gleymt að bjóða Tinnu vinkonu, hafði bara boðið Siggú. Svo var veislan í gangi einhvers staðar í einbýlishúsinu sem við vorum í (samt ekki hjá foreldrum mínum) og ég var bara ein í bömmer yfir að hafa gleymt að bjóða Tinnu og var allan tímann að spá hvort ég gæti sent henni sms um að koma. Fattaði samt að það var dónalegt en æ, hún er svo spontant alltaf. Úff, erfitt. Myndi aldrei gleyma að bjóða Tinnu í afmælið mitt. 

Vaknaði svo og engin hugsun kom. Ég er á survival mode. 

Namaste.

Þögn..

 .. er gulls ígildi og allt það en.. 

Hún getur líka verið mjög óþægileg. Eins og þegar einhver sem manni er annt um svarar ekki í símann í þrjár vikur. 

Lífið er svo mikið yin og yang, svart og hvítt, upp og niður, norður og suður. Jú, það á að vera þannig því eitt getur ekki lifað án hins en samt. 

Vikan var fín. Er búin að hreyfa mig á hverjum degi sem er líklegast ástæðan fyrir því að mér hefur liðið vel. 

Af hverju er þetta blogg sett upp í tveimur setningum og svo bil? Veit það ekki.

Verkefni vikunnar var CV eða Curriculum Vitae eins og ég lærði hjá enskukennara í MH. Fann eitt frá því í fyrra sem gengur alveg ennþá. Einhvern veginn hefur það orðið google docs eða pdf þannig að ég get ekki breytt því. Það er allt í lagi því ég er víst að fara á sérstaka vinnustofu í næstu viku á vegum Virk þar sem við lærum og gerum CV og kynningarbréf. 

Hápunktur vikunnar var gott foreldraviðtal með kennaranum hennar Guðrúnar Höllu. Kemur í ljós að Guðrún Halla er búin að brillera og fær bara tíur. Kristín kennari hrósaði henni í hástert, sýndi mér próf þar sem hún fékk 100% og talaði um hvað hún væri mikill fyrirmyndar nemandi og góður leiðtogi og ég veit ekki hvað og hvað. Minntist á hvað hún væri kurteis við alla sérstaklega. Ég er einstaklega stolt mamma. 

Lágpunktur vikunnar er sú staðreynd að hin dóttirin er ekkert búin að svara í síma í margar vikur núna. Það getur ekki verið gott. Ég bauð henni í nudd, eitthvað sem hún svarar vanalega, en nei. Ekkert. Mjög óþægilegt allt saman. Hef ekki kynnst öðru eins ef ég á að vera alveg hreinskilin. 

Bömmer

Namaste.

Einhvers staðar..

 ... er retreat sem ég á að vera á.

Fékk yfirþyrmandi tilfinningu í vikunni að ég þyrfti að koma mér í burtu en hafði ekki orku til að aðhafast eitthvað í því. Sá mjög mikinn mun á birtunni samt í vikunni þegar kona sem kemur til mín mánaðarlega kl. 16:30 kom og birtan hélst allt nuddið. Það er eitthvað! (Ég hef alltaf gluggatjöldin frá á Suðurlandsbrautinni til að horfa á fjöllin og fuglana og Esjuna og fellið í Mosfellsdal.) 

Verkefni vikunnar var að kaupa plöntur. Gat bara ekki leyft íbúðinni að vera með eina slappa plöntu (tvær reyndar.) Fór því og keypti mánagull og mánasilfur og einhvers konar indíánaplöntu. Varð að gera eitthvað fyrir þessa blessuðu íbúð sem er bara í framkvæmdafrosti þar til borðplatan kemur (í næstu viku vonandi.)

Hápunktur vikunnar var kannski bara í gær þegar ég var að sjálfboðaliðast. Það er svo gott að gefa til samfélagsins. Ef þetta gæti verið vinnan mín væri það awesome.

Lágpunktur vikunnar var að þurfa að segja nei aftur og aftur við unglingana mína. Finn á mér að þetta er bara byrjunin og við tekur nokkurra ára unglingasuð. Stefán er búin að bögga mig vegna bílsins og Guðrún Halla vill fara erlendis með vinkonu sinni um páskana. 

Þessi mamma (bendi á mig) þarf að komast í burtu. Yoga retreat í Tælandi hljómar vel..

Hef nú ekki mikið meira að segja svona í morgunsárið. Við ætlum í leikhús í kvöld. Það verður held ég í eina skiptið sem ég sé fólk í dag. Þetta er svona frekar einmanalegt líf sem ég lifi um þessar mundir. Amma Svava þarf reyndar að skipta um barnabílstól og það er svo skrítið að eins lítið og ég hef að gera er ég að ströggla við að koma því inn í dagskrána í næstu viku. Fer kannski á eftir og skila gamla. 

Húha.

Namaste vinir.

Janúar að klárast

 Um leið og ég hef elskað þennan janúar er líka alveg kominn tími á meiri birtu og þar með meiri orku.

Hef verið óvenju þreytt þennan janúar. Óvenju glöð líka sem er skýtið því vanalega finnst mér janúar erfiður. Það var ofboðslega erfitt að komast aftur í rútínu eftir hátíðarnar, hver sem sú rútína er. Hef haft það að aðalmarkmiði að mér líði vel og að taugakerfinu mínu líði vel og það hefur tekist að mestu. Er komin með á heilann að ég þurfi að fara vinna. Hef trú á að það takist á þessu ári. Er nú búin að tala um þetta í langan tíma núna. Málið er bara að ég er neurodivergent og ég get bara ekki verið einhversstaðar. 8 tímar hljómar eins og að labba Everest fyrir mig. Ég þarf alltaf að gera smá, taka hvíld. Gera aftur smá og taka hvíld. 

Verkefni vikunnar var að gera salat. Hef ekki gert neitt í eldhúsinu í lengri tíma þar sem Guðrún Halla sér um kvöldmatinn. Þetta var uppskrift sem ég sá á tiktok og tók alveg klukkutíma. Rauðlaukur, egg, tómatar, agúrka, túnfiskur og svo dressing með grískri jógúrt. Þetta var allt í lagi. Bragðaðist best fyrsta daginn svo ekki það vel.

Hápunktur vikunnar var hrós frá góðum kúnna í nuddinu. Það er svo gott að vita að maður hefur gert eitthvað rétt í þessu lífi og látið manneskju líða betur. 

Lágpunktur vikunnar var þegar bíllinn fór í viðgerð. Hann er alveg í fokki. Skilst að málið sé að kaupa nýjan bíl! 

Framundan í dag er drum circle smá af því að ég hef ekkert annað að gera og langar að hitta fólk. 

All is well. 

Namaste

Munurinn ...

... á taugatýpísku og taugafjölbreyttu fólki.

Eins og ég minntist á í síðasta bloggi ætla ég að skutla hingað inn greininni sem birtist í smá stund á www.visir.is. Hún er þar ennþá ef þið setjið inn leitarorðið taugafjölb.. Sem sagt ekki pistill vikunnar eins og vanalega núna heldur bara greinin. Gjörið svo vel:

Þessi grein er um málefni sem snertir mig djúpt. Alla daga. Það er munurinn á taugatýpísku (neurotypical) fólki og taugafjölbreyttu (neurodivergent) fólki. Þessi munur snýst um skynjun og hvernig heilinn vinnur upplýsingar. Aðalatriðið er hvernig skóla- og vinnuumhverfi er í raun hannað fyrir taugatýpískt fólk og hvernig taugafjölbreytt fólk á erfitt með að aðlaga sig að því.

Taugatýpískt (neurotypical) fólk hefur hugsun og taugaþroska sem fellur að því sem samfélagið telur ”hefðbundið” eða algengast. Samskipti eru auðveld samkvæmt óskráðum félagslegum reglum, skynjun hljóðs, ljós o.s.frv. er yfirleitt innan ”meðaltals.” Þ.e.a.s. hljóð og birta truflar taugatýpískt fólk að meðaltali ekki. Skipulag, athygli og tilfinningastjórnun passa vel við skóla- og vinnuumhverfi. 

      Taugafjölbreytt fólk hefur heila sem vinnur á annan hátt en venjulegt þykir. Þetta getur falið í sér greiningar eða einkenni eins og einhverfu, ADHD/ADD, dyslexíu og aðrar námsraskanir, tourette, OCD eða aðra taugaþroskafræðilega fjölbreytni.

      Það sem er algengt hjá taugafjölbreyttu fólki er skynjun (t.d. mjög næm fyrir hljóði eða ljósi.) Hugsun getur verið mjög djúp, nákvæm eða skapandi. Þau geta átt erfiðara með óskráðar félagslegar reglur og þurfa oft aðlögun í skóla eða vinnu en hefur jafnframt styrkleika sem nýtast vel.

Það sem er mikilvægt að hafa í huga er að neurodivergence er hluti af mannlegri fjölbreytni, ekki sjúkdómur í sjálfu sér. Samfélagið er oft hannað fyrir neurotypical fólk, sem getur skapað hindranir. Margir neurodivergent einstaklingar hafa einstaka styrkleika (t.d. rýni, heiðarleika, sköpun, þrautseigju.)

·        Neurodivergent rófið er ansi vítt og breitt og einstaklingarnir innan þess ólíkir. Það er mín von og trú að neurotypical fólk skilji neurodivergent fólk betur og í framtíðinni sé tekið meira tillit til okkar í skólum og vinnuumhverfi öllu. Ég vil vitundarvakningu og að sérstaklega fagfólk og þeir sem vinna með fólki þekki muninn á taugatýpísku fólki og taugafjölbreyttu fólki.

Svava Ólafsdóttir

Heilsunuddari 

·       

Fékk hland ...

... fyrir hjartað tvisvar í vikunni. 

Merkilegt hvað það gerist stundum mikið á einni viku og tíminn flýgur. Aðrar vikur silast tíminn áfram.

Það var allt að gerast á miðvikudaginn. Þá kom hérna innanhúsarkitekt til að hræra aðeins meira í hausunum okkar. Þeir voru alveg nógu hrærðir fyrir sko. Færa eyjuna... já ok. Fór þennan sama dag í hth innréttingar til að koma pöntuninni á borðplötunni af stað. Það er allavegana eitthvað að gerast. Svanur kom líka með nýjan ofn í eldhúsið og helluborð með innbyggðri viftu á þriðjudaginn. Duglegur en það mætti svo sannarlega vera meiri gleði yfir þessu öllu saman. 

Hlandið kom þegar ég var búin að senda grein á visi.is og fékk svarið "tímastillt 10:30" frá Atla Ísleifssyni. Eins og það væru 2 min í sprengju. Lét vini mína á bluesky vita og fann góðar undirtektir nema að mér hafði tekist að rugla smá í byrjun og þurfti að biðja um leiðréttingu. Eins konar orðavíxl. 

Verkefni vikunnar var að koma okkur fram og tilbaka í sumar þegar Guðrún Halla er að fara keppa á Partille cup í Svíþjóð. Vil að við séum innan handar ef eitthvað kemur upp á. Líka vera til staðar. Auðvitað var selt upp í öll flug til Gautaborgar en tókst að fá flug til og frá Stokkhólmi. Svo þarf ég að fatta hvar við gistum..

Hápunktur vikunnar var að fá birta eftir mig grein á visi.is. Er samt dáldið fegin að hún fór fljótt af síðunni þar sem hún var ekki undir mest lesnu innsendu greinunum. Hún fjallar sem sagt um muninn á taugatýpísku fólki (neurotypical) og taugafjölbreyttu (neurodivergent.) Þið finnið hana undir leitarorðinu taugafjöl.. Svanur náttúrulega skildi ekkert í henni og Óli minn spurði hvort ég væri með þetta? 

Lágpunktur vikunnar var að eftir að greinin var birt sá ég að það voru tvær stafsetningarvillur í greininni. Lét vita og búið að laga en líka að ég vil ekki setja þetta á Facebook strax því að mér finnst eins og fólk bara skilji ekki. Kannski aðeins seinna þegar ég er búin af jafna mig á hlandinu fyrir.. þið vitið. Hjartanu.

Birti hana hér í pistli næstu viku. Læt það þá bara líklegast duga. Verð ekki með fasta liði eins og vanalega.

Namaste.

 

Virk..

 .. eða óvirk. Það er spurningin.

Þessi fyrsta vika ársins hefur verið skrýtin. Mjög erfitt að koma sér aftur í rútínu og í takt við aðra sem labba í takt og hafa orku til þess. Yoginn í mér leyfir mér að taka því rólega því það er svo sannarlega það sem ég þarf í janúarmyrkrinu og frostinu. Þarf mikinn svefn og óvenju mikla hvíld. Hef lært að það borgar sig að hlusta á líkamann og það er það sem ég er að gera. Skrýtið hvernig aðrir vilja líka ekki bara hvíla sig?

Kaosið gerði margar tilraunir til að ná mér í vikunni. Það er erfitt að búa í íbúð sem er hálfgert kaos með tveimur eldhúsum og með fólki sem það virðist ekki hafa nein áhrif á. Svanur talar um að það sé maður að koma varðandi baðherbergið.. ég veit ekkert hvað það þýðir. Þarf ég að flytja út aftur? Það er allavega guðs lukka að það myndi líklegast ganga upp. 

Hugsa daglega til rólegrar náttúru þar sem enginn er nema náttúran og ég og rigningin. Það sem er í hrópandi mótsögn við það er að ég er komin í hóp annarra mæðra sem erum bekkjarfulltrúar. Óvenju kröftugur hópur, það er að segja þær. Ég er bara hérna introvertinn sem hræðist fjöldasamkomur. 

Verkefni vikunnar var að koma jólaskrautinu niður í geymslu. Það tókst en auðvitað er einn jólalegur diskur sem gleymdist sem þýðir að ég þarf að fara aftur niður í geymslu þegar ég er zenuð og ná í stóra þunga kassann sem auðvitað er á efstu hillunni til að bæta þessum eina hlut í hann.

Anyways, hápunktur vikunnar var í gær þegar ég komst óvænt í stuð við að heyra Herra hnetusmjör í bílnum. Tuddastuð sem það hlýtur að vera að vera á tónleikum með honum:)

Lágpunktur vikunnar var á miðvikudaginn þegar kaosið gerði atlögu að mér úr öllum áttum. Ég hafði gert to do lista um morguninn sem ég var að sinna. Þurfti að gera ákveðinn hlut sem ég ætlaði að gera þegar ... Svanur bað mig að vinna í tölvunni fyrir fyrirtækið ... you guessed it, allt í einu og núna. Það er alltaf þannig. Á sama tíma kom barnið með alls konar fyrirspurnir varðandi alls konar. Svanur var að tala um þrjá mismunandi hluti á sömu mínútunni og já, eitt af þeim var að sjálfsögðu borðplatan í eldhúsið. Þetta er orðið svo vandræðalegt að ég vil ekki tala um það. Allan tímann var ég að hugsa um það sem ég ætlaði að gera til að byrja með. Á þeim tímapunkti átta ég mig á að ég var að fá tölvupóst sem var fyrirspurn um vinnu?! Var einmitt nýkomin heim af fundi með ráðgjafanum frá Virk þar sem við vorum að ákveða dáldið leyndó.

Kaosið náði mér ekki. Það er gott. Það væri kannski ekki slæm hugmynd að fara út á Álftanes til að forðast það í næstu viku. Hver veit hvort það gerist? Ekki ég allavegana,

Namaste vinir.

Rútína hvað?!

 Jæja,

á þessum bæ er svo mikið frí að halda mætti að húsfrúin væri að vakna upp úr einhvers konar roti. Í gær, nýársdag, var eins og við værum í fríi allra fría og fórum í langan göngutúr á Gróttu. Dásamlega fallegt! Sólsetrið var einstaklega yndislegt. Allt var lokað auðvitað eins og vera ber á nýársdegi og við horfðum á lokaþáttinn af Stranger things sem kom út í gær. 2ja klukkutíma þáttur!

Í morgun var eins og ég væri að vakna upp af roti. Mér brá mikið þegar ég sá að klukkan var orðin 10! Frekar óþægilegt að vakna svona seint. Var í nokkra klukkutíma að finna taktinn í þessum öðrum degi árins 2026. Óþægilegt að fatta að það var eins og ég hafi sofið af mér almennar mannlegar skyldur eins og að borga reikninga og svona. Fattaði það allt í einu að ég hafði ekkert kíkt inn á einkabankann í fríinu. Úps! Fattaði ekki einu sinni að það væri föstudagur í morgun. Að einhverju leyti reyndar en ekki öllu. Gleymdi til dæmis að blogga í morgun. Það er kannski það jákvæða við þetta að eitthvað hefur manni tekist að slappa af!

Verkefni vikunnar var að mála forstofuna. Það tókst með herkjum þar sem Svanur hafði í miklu að snúast þann 30. des. Fór í margar búðir til að finna nýárs kvöldmatinn og svo komu jú óvænt rúm 40 kg af kjöti að norðan sem kostaði auka snúninga eins og að kaupa óvænt frystikistu nokkrar mínútur í lokun. 

Hápunktur vikunnar voru sjálf áramótin. Mér fannst gaman að klæða mig upp og mála mig og vera fín. Árlega áramótaboðið hjá foreldrum mínum er alltaf með sama sniði en fjöldinn hefur breyst. Þetta var skemmtilegt boð og ykkar kona í stuði.

Lágpunktur vikunnar var þegar ég gerði asnalegan hlut. Jú, ég skammast mín. Já, ég geri asnalega hluti stundum en hey! Þú lifir og þú lærir. Sá sem sagt á tiktok svona trend hvernig kínversk leikfimi kemur aldeilis sogæðavökvanum af stað og jú er svo einstaklega orkugefandi og grennandi. Þetta var svona hoppa upp og niður 50 sinnum og fleiri æfingar eins og að sveifla höndunum alls konar og fleiri æfingar. Í mínu tilviki hafði þetta þau áhrif að ég hélt að ég væri að fá fyrir hjartað og líka blóðtappa í kálfann. Þvílíka veislan að vera að googla: blóðtappi í kálfa á þorláksmessu. Það þurfti hana Sophiu mína nálastungukonu og hjúkrunarkonu til að segja mér að snarhætta þessu meðþví sama. Æfingunum það er að segja. Viti menn, mér líður betur en ansi harður biti að kyngja að ég sé of gömul fyrir þessar æfingar. Ái. Já og heldur ekki í formi fyrir þær. Ái.

Oh well,

Gleðilegt nýtt ár elskurnar!